تجربة الدكتور محمد يوسف للحصول علي سكور 7.5 في الآيلتس IELTS

Thursday, January 11, 20181comments

من باب ( من لا يشكر الناس لا يشكر الله ) ... عايز أشكر دكتور بشير على مجهوده معانا ... على تشجيعه ونصايحه ولينكاته وتصحيحه لكتاباتنا ... دى خامس مرة أدخل فيها إمتحان الأيلتس والحمد لله ربنا وفقنى ... الإمتحان مش صعب أوى والله ...ولكن كان فى عندى أخطاء أخدت منى أكثر من محاولة عشان أتجنبها ... أنا تحت أمركم فى أى سؤال أو إستفسار عشان تتجنبوا أخطاءنا وتعملوا الإسكور من أول مرة....
.............................
(تحديث)
طيب بناء على رغبة الجماهير الغفيرة 😄 .... دى خلاصة خبرتى فى الأيلتس ...
..........
WRITING
طيب ... بسم الله ... كلمة للرايتنج .. للناس اللى بتجيب ٦.٥ ومافيش فايدة ... أنا طبعا كنت واحد منهم ... أنا جبت ٦.٥ فى الرايتنج ٤ مرات فى ٤ امتحانات ... بصوا يا إخوانا ...
١- ماتدخلوش الإمتحان إلا وأنتم كاسرين الوقت فى الممارسة والمذاكرة لوحدكم ... بمعنى إنك تبقى قادر تكتب تاسك ١ فى ١٥ دقيقة فقط وقادر تكتب تاسك ٢ فى ٣٠ دقيقة ... لأنك ببساطة محتاج بعد ماتكتب تراجع كتابتك وتصحح لنفسك ... ده مهم جدا جدا جدا من هنا لآخر الشارع ... وحط التاتش الحلوة بقى يا أخى ... شيل الكلمات المتشابهة وحط مترادفات قوية من عندك عشان تبهر المصحح ... والنقطة الثانية .. انت فى الإمتحان هاتبقى متوتر ومرتبك والأدرينالين عاملك منتال بلوك ... وهاتاخد وقت اطول من وقتك الطبيعى ساعات المذاكرة
....
٢- لازم تقلد كتابات الناس الجامدين ... اللى هما العالم اللى بتجيب ٩ فى الرايتنج ... لازم يبقى عندك نوت بوك تكتب فيه الجمل القوية المركبة ... وتكررها خمسمائة مرة ... وتكتب من دماغك جمل على نفس تركيباتهم القوية عشان ترتقى بأسلوبك عن أسلوب كتاباتنا البسيط بزيادة ...
....
٣- اوعى تحفظ كلمات مجردة عشان تقوى حصيلة كلماتك ... أوعى تشترى الكتب اللى مليانة كلمات للأيلتس فى كل المجالات ...اوعى ... عارف هاتبقى عامل ازاى ؟ ... هايبقى عندك كلمات كتير بس مش عارف تحطها فى جمل وأفكار قوية ... أى موضوع يقابلك وعايز تكتب فيه مقال محترم .... أذخل على جوجل واكتب رأس الموضوع ونزل مقالين ثلاثة محترمين ... وادرسهم كويس ... وهات كشكولك الجميل واكتب فيه جمل ومقاطع كاملة ... اوعى تكتب كلمات مجردة ... عشان تضرب عصفورين بحجر ... يبقى عندك كلمات وعندك صياغة قوية وعندك أفكار مستواها عالى .... كده بقوا ثلاثة عصافير مش مهم ... واقعد ذاكر المقاطع والجمل دى كتير اوى اوى اوى ... وبعدين اقفل الكشكول واكتب مقالين ورا بعض من دماغك بس فى نفس الموضوع طبعا ... والله مش هاتتخيل مستواك هايقفز ازاى فى فترة بسيطة ...
....
٤- ماتدخلش الإمتحان قبل ما يبقى عندك القدرة إنك تكتب ٢ إمتحان رايتنج ورا بعض فى قاعدة واحدة ... يعنى اتنين تاسك وان وتو ورا بعض ... لازم تبقى كتابة التاسك عندك حاجة بسيطة مش معجزة ...
....
٥ - شوف حد يصحح لك وخليها يراجع كتاباتك ويصححها ...
....
٦- ماتدخلش الإمتحان لو لسه بتعمل أخطاء فى الجرامر ... عيب والله
.....
المصادر
https://www.ielts-exam.net/
وطبعا كتب كامبريدج من٦ الى ١٢
---------------------------
SPEAKING
كلمة للسبيكنج ....
الأول عايز أقول إن فى المرات السابقة كنت بجيب ٨ فى الإسبيكنج وربنا ... وحسبى الله ونعم الوكيل 😄
١- صباح الخير بتاع السبيكنج هو موقع
http://www.ieltsspeaking.co.uk/ielts-vocabulary/
الموقع ده عالمى يا إخوانا بيقدم لك أهم نصائح وفيديوهات عشان مستواك يعلى ويتقدم ... وبيقدم لك أهم ٢٠ موضوع فى الإسبيكنج لا يكاد يخلو منهم إمتحان ... وهاتفهم منه الأسئلة بتتسأل إزاى وبتجاوب عليها إزاى ... الموقع ده أنا استفدت من الكلمات اللى فيه كمان فى الرايتنج لأنه فعلا بيقدم لك موضوعات بكلمات وأفكار ممتازة ... مطلوب منك ايه ... مطلوب منك إنك تذاكرالموضوعات دى حوالى خمس ست مرات منفصلة عشان فعلا تقدر تهضم الكلمات دى وتستخدمها بسلاسة ....
.....
٢ - موبايلك الجميل وسجل لنفسك مقاطع وانت بتحاول تجاوب على الأسئلة ... وشوف نفسك بتسيب فراغات وبتأوأ كتير ولا عندك انسيابية فى الكلام ( fluency) ... وحاول تظبط طريقة كلامك ... خللى بالك ان الإنسيابية فى الكلام مش معناه إنك بتتكلم بسرعة ... ولكن معناها إنك مش بتقف كتير أو بتتردد فى النص
....
٣ - ما تدخلش الإمتحان لو لسه مش عارف تتكلم دقيقتين على بعض ... لأن فى الإمتحان هايطلب منك تتكلم دقيقتين متواصل ... وهاتحس إن حلقك جاف جدا من التوتر وهاتتلخبط ...
.....
٤- أى حد من الحبايب أو الزملاء اعرض عليه انك تذاكر معاه... جهزوا موضوع من الموضوعات اللى قلنا عليهم ... ذاكروه كويس .. وبعدين اعملوا الإمتحان بتبادل الأدوار ... هايفرق جدا معاك ...
....
٥- ماتذاكرش من غير قاموس ناطق للهجة البريطانية والأمريكية ... بالمناسبة الإتنين مقبولين جدا ... السبب ببساطة هو إن احنا تعلمنا إنجليزى باللهجة الصعيدية ... وده مش هاينفع فى الإمتحان ... اه نسيت اقول لك ان فى فرق بين انك تنطق الكلمة صح وانك تنطقها بأكسنت أمريكى أو بريطانى ... المطلوب منك النطق الصحيح ولو فى معاك أكسنت يبقى خير وبركة ...
.....
٦- فى على اليوتيوب فيديوهات جميلة ...عشان تعرف تحييى الأكسامنر ازاى وتشكره إزاى وتصحح خطأك إزاى ولو مافهمتش سؤاله تقول له يكرر السؤال إزاى ... خد عندك مثلا قناة
https://youtu.be/ChZJ1Q3GSuI
ودى عليها شوية ناس أفاضل عاملين فديوهات فى منتهى الجودة ... خد لفة فيها كده وخد فكرة ...
وخد كمان قناة الأستاذة النجيبة ليز
http://www.youtube.com/playlist…
وصدقنى مش هاتندم
.....
٧- الممارسة ثم الممارسة ثم الممارسة ... بص ياعم انت تحاول فى كل موقف انت فيه فى حياتك تفكر هاتتكلم عنه ازاى بالإنجليزى من الأخر كده ... عايزك تكلم نفسك بصوت عالى بالإنجليزى طبعا ... حتى لو الناس هايفكروك مجنون مش مهم ... المهم إن مركز المخ المسؤول عن اللغة الإنجليزية يتنشط معاك طول الوقت ...
-----------------------------------------
READING
كلمة للريدنج ..
مبدئيا كده لو مش هاتعود نفسك تقرأ كل يوم على الأقل نص ساعة فى الجرايد الأجنبية يبقى مش هاتتحسن بسرعة فى الريدنج ...
١- مافيش فى الممارسة أو الإمتحان حاجة إسمها إنك تقرأ القطعة الأول وبعدين تدور على حل الأسئلة ... هاتضييع وقت وهاتنسى وهاتغلط ... لازم تدرب نفسك إنك ماتقرأش حرف فى القطعة إلا وإنت عارف بتقرأها لسؤال إيه وعايز تجاوب بيها على إيه ... يعنى احنا هانقرأ الأسئلة كلها الأول ... وبعدين نقرأ القطعة وإحنا بنجاوب فى نفس الوقت على الأسئلة ... على فكرة هو مش بيلعب معاك فى ترتيب الأسئلة بالعكس فى معظم الأحيان بيمشى بالترتيب ... بمعنى إن أول أربع أسئلة هاتبقى إجاباتها فى أول ثلاثة فقرات وهكذا
.....
٢- إوعى تكون فاكر إن الناس اللى بتحيب ٩ فى الريدنج بتبقى فاهمة كل كلمة فى القطعة ... أبسليوتلى خالص ... احنا جبنا قبل كده ٨ و٨.٥ فى الريدنج وكان فى كلمات كتير فى القطعة مش عارفين معناها ... بس الفكرة إنك بتتدرب على إنك تخمن المعنى وتقفز على الكلمات الجديدة وتعود عينك تدور على الإجابة حتى لو فى كلمات غامضة ....
......
٣- ماتدخلش الإمتحان لو مش عارف تجيب ٧.٥ فى الريدنج وانت بتذاكر .... ما تدخلش الامتحان لو مش عارف تحل القطعة فى أقل من ١٧ دقيقة .... ماتدخلش الإمتحان وانت مش قادر تحل ٢ امتحان ريدنج ورابعض فى قاعدة واحدة يعنى ٦ قطع متواصلة وتجيب فيهم ٧.٥ على الأقل ... صدقنى هاتضييع فلوسك على الفاضى ومش هاتعمل كويس فى الإمتحان ...
.....
٤- سؤال T/F/NG .... عايز تركيز ومش عايز فزلكة أو تخمين ... لازم يبقى الكلام مكتوب قدامك بالحرف بالإيجاب أو السلب عشان يبقى صح أو غلط ... أسئلة NG بتوقع ناس كتير لأنهم بيعتقدوا إن طالما معظم الكلام مذكور فى القطعة يبقى نمشيها صح ... أبوس إيديكم الموضوع والله سهل بس عايز صحصحة ...
....
٥- أسئلة أسماء الشخصيات أول لما تشوفها فى الإمتحان لازم تتطلع قلمك الرصاص الظريف وتعلم لى على كل إسم هاتشوفه فى القطعة ... وتحل الأسئلة واحد واحد ... ده سؤال سهل قلما الناس بتغلط فيه ...
.....
٦- الريدنج مش محتاج مدرس ... محتاج جنابك تقرأ كتير كتب وجرايد وتتدرب كتير وتصحح لنفسك ...
.....
٧- أسئلة العناوين أو إختيار عنوان للفقرة ... فيها خدع ودهاء وشقلبة زى ماانت عايز ... بص ياباشا انت هاتلاقى العناوين كلها تقريبا تمشى مع كل فقرة أو براجراف ... والحل طبعا إنك تفهم كويس هو عايز فعلا يقول ايه فى كل براجراف ... وبلاش تاخد بالشبة أبوس إيدك لأن فعلا الموضوع بيوقع درجات ....
....
عايز تحل ريدنج كويس ... إبدأ بسلسلة كامبريدج من ٦ لفوق ... ماتدخلش الإمتحان قبل ما تحل كامبريدج ١٠ و ١١ و ١٢ وتحيب فيهم على الأقل ٧.٥ ....
…….
-----------------------------------------
LISTENING
كلمة للإستماع ..
صباح الخير بتاع الإستماع هو موقع 6minutes english العظيم
http://www.bbc.co.uk/learningen…/…/features/6-minute-english
بص ياباشا انت لو مش بتسمع يوميا نص ساعة على الموقع ده مش هاتقدر فعلا تحسن مستواك فى الإستماع ... الموقع ده هو ٨٠ فى المائة من مستواك وأدائك فى الإمتحان ... على فكرة خش على البلاى ستور على أندرويد أو أيفون وهاتلاقى أبليكاشن للموقع ده كمان ...
....
١- ماتدخلش الإمتحان لو مش بتعرف تجيب ٧.٥ فى الممارسة والمذاكرة لوحدك ... ماتدخلش الإمتخان لو مش بتقدر تحل ٢ إمتحان إستماع ورا بعض فى قعدة واحدة من غير ماتحس إنك عملت مجهود ...
....
٢- لو انت من هواة الأفلام ... نزل الترجمة الإنجليزية للفيلم وركز مع النطق أبوس إيدك .. مافيش مانع تتبسط وتستفيد فى نفس الوقت ..
....
٣- لازم تتعود تقرأ الأسئلة بسرعة فى الأوقات الضيقة فى الإمتحان بين كل سكشن والتانى ... قراءة الأسئلة بسرعة هى اللى هاتخليك تحل كويس فى الإمتحان ... خللى بالك صعوبة الأيلتس إنك بتسمع وبتحل فى نفس الوقت ... يعنى لو ماكنتش قرأت السؤال بسرعة وفهمت ايه الكلمة اللى انت مستنيها هاتضيع عليك ومش هاتقدر تعرفها ... الممارسة ثم الممارسة هاتخليك كويس...
....
٤- أسئلة ال mcq فى الإمتحان هى أغلس أنواع الأسئلة .. محتاجه يكون معاك قلمك الرصاص الظريف وتعلم على الكلمات المهمة فى السؤال عشان تعرف انت هاتجاوب على ايه وتقعد بقى تستنى الإجابة ...
...
٥ - الليسننج زى الريدنج مش عايز مدرس ولا كورس ... عايز تدريب كتير ... بس الميزة فيهم انك لو وصلت لمستوى كويس فيهم خلاص تقدر فعلا ترميهم ورا ظهرك وتخش الإمتحان وانت ضامنهم ... أنا مثلا الحمد لله فى آخر امتحانين ليا ما كنتش بذاكرهم أصلا والله العظيم ... كنت بحل عليهم أسئلة بسيطة ... وبفضل الله كنت بجيب دايما فوق ٧.٥


Share this article :

+ comments + 1 comments

November 30, 2020 at 7:52 PM

It will take longer than your normal study hours


Sexy Casino
ALLBET Casino

Post a Comment

 
Support : Creating Website | Johny Template | Mas Template
Copyright © 2011. Medical Show - All Rights Reserved
Template Created by Creating Website Published by Mas Template
Proudly powered by Premium Blogger Template