كيف تتعامل مع تأخير النجاح في الآيلتس

ازاى تتعامل مع تأخير النجاح الأيلتس

انا كنت حابب اكتب تجربتى مع الأيلتس مش عشان أتكلم عن مصادر أو طرق مذاكرة لان ناس كثير قوى اتكلمت عنها قبل كده و لكن حابب انقل وجهة نظر معينة عن تجربة الحلقة المغلقة اللى كتير مننا ممكن يمر بيها فى امتحان الأيلتس و ححاول أساعد إن الناس متكررش غلطة شهيرة ممكن بتفقدك الأمل فى لحظات معينة و بتصعب عليك الأمور و بتحطك تحت ضغط عصبى رهيب .
أنا دخلت الأيلتس حوالى عشر مرات و فى مرتين تانى أخدت فلوسى عشان اشتكيتهم 😂😂😂مرة كانت فى مصر و مرة برة مصر . أول مرة جبت ٦.٥ overall و
وكانت درجة الwriting 6.5
ودى تانى اعلى درجة بعد المرة اللى نجحت فيها.اقدر أقول مرة كانت عرفتنى مستوايا فين. و اخدت بعدها حوالى ٣ شهور و حضرت كويس قوى و دخلت و كانت النتيجة
Speaking 7.5
Writing 6.0
Listening 8.0
Reading 7.0
وهنا تبدأ المشكلة انك بتحس نفسك قربت قوى و انها بس مسألة مرة تضرب معاك و فى المرحلة دى حتدخل الحلقة المغلقة اللى معظم الناس بتدخل فيها فى رحلة الأيلتس. وفضلت كده ادخل الامتحان حوالى سبع مرات لغاية لما ربنا أراد و نجحت فى إسكندرية ودى تعتبر المرة الوحيدة اللى دخلت فيها فى مصر لان كان فى مرة اشتكيت و اخدت فلوسى من غير ما تظهر النتيجة بتاعتى.

أولا خلينا نتفق على قواعد معينة مهمة
1. الوقت المناسب: ربنا سبحانه و تعالى كاتب لك وقت معين تنجح فيه و هو حيكون أفضل وقت مناسب ليك عشان تنجح فى الإمتحان سواء عرفنا السبب أو معرفنهوش.
2. كل واحد يبص فى ورقته: فى نوعين من الناس اللى بتدخل الأيلتس . النوع الأول اللى مستواه عالى جدا فى اللغة لأنه أتيحت له الفرصة من هو وصغير انه يتعلمها صح و يمارسها صح و ده غالبا حينجح من أول مرة و أعرف كذا واحد من زمايلى ما شاء الله دخل جاب الدرجة بمذاكرة أسبوع مثلا. و النوع الثاني اللى يمثل الأغلبية و هو اللى مستوى اللغة عنده مش قوى لدرجة انه يجيب الدرجة المطلوبة و أخص بالذكر الرايتنج يليه السبيكنج وده فى نسبة منهم ممكن مع التوفيق ثم التحضير الكويس ربنا يكرمه و ينجح من أول أو تانى مرة . و النسبة الأكبر التانية اللى بيدخل الحلقة المفرغة ودولا اللى انا بوجه كلامى ليهم. ف كل واحد يبص فى ورقته و ملكش دعوة باللى حواليك .
3. وقت الوقفة مع نفسك : و دى أخطر نقطة و هيا إن احنا بنفتكر إن الموضوع بسيط و ان كلها نص درجة و خلاص وجايز الحظ يلعب و تضرب و اجيب النص درجة فى اى محاولة و خطورة الموضوع ده إنه بعد المحاولة السادسة بيبقى ضغط عصبى فظيع و ممكن جدا يخليك تحبط و ما تكملش السكة . تجربتى الشخصية و ده أهم نصيحة بعد ثالث مرة لازم تقف و ما تدخلش تانى و تشوف فعلا فين المشكلة فى الكتابة بتاعتك و لازم حد لغته كويسة جدا و يا ريت لو native يصلحلك لان فعلا حتكتشف ان عندك مشاكل و عيوب ثابتة لازم تلاشيها و إلا مش حتعرف تجيب الدرجة المطلوبة. و ده فعلا نصحتنى بيه فى أحد المرات فى السبيكنج ممتحنة native و كانت سألتنى قبل ما ابتدى انت دخلت قبل كده قلت لها آه انا خبرة 😂😂😂😂بس مشكلتى فى الرايتنج و بعد ما خلصنا قالت لى نصيحة لو مجبتش الدرجة المطلوبة فى الwriting الإمتحان ده ما تدخلش تانى غير لما تعرف مشكلتك فين فى الكتابة و اديتنى ٧.٥ فى السبيكنج فى المرة دى . الشاهد انها قالت نفس النقطة الخطيرة انك تقف و تشوف المشكلة فين وفعلا انا كانت مشكلتى تقريبا من بعد المحاولة الرابعة انى مبلحقش اكمل امتحان الرايتنج والمرة اللى تقريبا كملت فيها بعد ما اتعلمت الصح نجحت .
4. ما تعقدهاش و متفكرش كتير : وده حل مشكلة الوقت و التفكير الزيادة لأنى بعد ما اشتغلت على الكتابة و حسّيت فعلا انى اتحسنت جدا و عرفت الطريقة الصح لقيت نفسى مش بحصل أخلص الwriting و ده لانى بطىء فى الكتابة و الخط مش كويس فَلَو سرعت يبقى المصحح مش حيعرف يقرأ اللى انا كتبته. وده اللى نصحنى بيه أحد الناس اللى صححت معاهم خد الأمور ببساطة و متحاولش تفكر فى أفكار صعبة و اكتب اول أفكار تيجى على بالك مع أمثلة لانه فى الآخر امتحان لغة ومش بيقيم جودة الفكرة بس طبعا لازم يكون كلام منطقى مع أمثلة .
5. الأمثلة: وعملتها نقطة لوحدها لأهميتها القصوى ودى ناس كتير وكنت واحد منهم انى آخرى اكتب مثال واحد فى الموضوع كله و لكن لازم تكتب مثالين على الأقل لانه مطلوب نصا فى السؤال انك تضرب أمثلة وفى نفس الوقت بيوفر وقت فى الكتابة لانه بيقلل الأفكار اللى محتاج تكتب عنها .
6. اعرف طريقة صح و طبقها و امشى وراها وما تشتتش نفسك :
ودى مشكلة كبيرة بتقع فيها انك بتتشتت ورا آلاف المصادر و الفيديوهات ومش عارف تمشى ورا مين اللى اكتشفته وده وجهة نظر شخصية إنه فى طرق كتيرة صح أى واحدة تنفع بس كلهم متشابهين فى نقط رئيسية عشان كده لا أنصح ب

تعدد المصادر و عشان كده انصح بالمصادر اللى جاية لانه لا خلاف عليهاودى وجهة نظر شخصية بس أكيد فى مصادر تانية كتير كويسة.
ودولا حقسمهم لقسمين
١.تحسين لغتك
ودولا كتابين كتاب vocabulary و كتاب grammar و الإتنين من إصدار Cambridge

Vocabulary for IELTS
Grammar for IELTS
والإتنين من إصدار Cambridge

٢.طريقة الكتابة فى الامتحان
وده فى كورس اسمه master class
عن طريق الIDP
ده بتقدر تدخل على الكورس مجانا لمدة شهر فى مهارة انت بتختارها اللى هيا طبعا الرايتنج .
او ممكن تشترك لمدة ٤٥ يوم عن طريق الموقع
https://www.ieltsonline.com.au/enrolment/

و لو عايز تقرأ مواضيع فى task1 or task 2
ف موقع سايمون أكثر من رائع وبرده ممكن هو اللى تعتمد عليه فى طريقة الحل
http://ielts-simon.com

فى موقع تانى ده اكتشفته قبل الإمتحان اللى نجحت فيه عاملاه مؤلفة كتب
Vocabulary for IELTS
Cambridge official guide for IELTS
انا مجربتهوش بس أكيد ممكن يكون مصدر كويس.

http://www.ieltsweekly.com

متشغلش بالك اى واحد من الثلاثة يريحك كفاية وبعدها لازم تتمرن كويس.
٣ . التصحيح : انا جربت اكتر من حد يصححلى بس بصراحة أفضل واحد اتعاملت معاه اسمه john
وده لينك الموقع بتاعه
وده ايميله
john.e.english.skype@gmail.com

http://johneenglishskype.wix.com/lessons

كان واحد صاحبى الله يكرمه قال لى عليه وده ميزته فى التصحيح من ناحية دقة اللغة إنما مش مهم تاخد منه طريقة حل
المهم يصلحلك غلطاتك فى اللغة و هو دقيق جدا لدرجة انه ممكن يحبطك فصلح اللى تقدر عليه إنما هو بيفوتش اى غلطة و طبعا عشان تجيب ٧ عادى انك تغلط بس مش basic grammar mistakes
اللى غالبا حتقدر تتلاشها لو راجعت فى آخر ٥ دقايق فى الإمتحان.
٧ . لا تيأس:
فى رحلة الأيلتس ممكن بييجى لحظات انك خلاص بتحس انك مش حتعرف تنجح و ان الموضوع خلاص مش نافع. بس ثق تماما إن لما بتلاقى الأمور قفلت قوى و خلاص فقدت الأمل ساعتها بيكون فرج ربنا قريب و بيكرم و بتنجح و بتخلص من كابوس الأيلتس.
ربنا يوفقكم جميعا و يعين كل واحد انه يعدى امتحان الأيلتس على خير.