تجربة الدكتور مختار ابراهيم في الحصول على سكور 8 في الآيلتس

الحمد لله رب العالمين 

بفضل الله اجتزت اليوم امتحان الايلتس وحصلت علي سكور 8

أود أن اشارككم تجربتي لعلها تفيد احد الزملاء 

أولا : لا تيأس وتوكل علي الله ...هذه هي المحاوله السادسه لي وكانت تجربه مريره ان امتحن نفس الامتحان 6 مرات متتاليه وللعلم انا ذهبت اليوم ومعي الفلوس لحجز مرة سابعه في حالة عدم تحقيق السكور المطلوب.

ثانيا: ركز جدا في التحضير للامتحان مرة وداخل الامتحان 100 مرة

ثالثا: لو عايز سكور أقل من 7.5 أو 7 في كل مهارة متقلقش خالص أعتقد أي دكتور لو ذاكر أسبوعين وحل 5-6 امتحانات هيجيب الرقم ده بسهوله . المشكله في ال 7.5 وخاصة 7 في الwriting 

رابعا: الامتحان صعب فعلا بس مش مستحيل فاحترمه وجهز له كويس بس متخافش ومتيأسش . أعرف زملاء امتحنوا 10 -15 مرة وفي الاخر عدوا

خامسا: كل واحد عارف مستواه كويس . مثلا الزملاء اللي اتعلموا في مدارس دوليه أو عاشوا في دولة أوروبيه فترة الانجليزي بتاعهم كويس ومحتاجين تحضير بسيط . أما اللى زي حالاتي مدارس حكومه وأول علاقتهم باللغه في اعدادي هيحتاجوا مجهود أكبر

سادسا: هنتكلم عن المهارات الاربعه

1. Listening

حل الامتحانات في كتبCambridge من 1-10 مرة واتنين وتلاته لحد متلاقي نفسك بتحاوب حوالي 35 سؤال صح من 40 وكل واحد حسب مستواه . والافضل تحل في ورق خارجي مش الكتاب علشان لو هتعيد نفس الامتحانات ومتقلقش في البدايه هتجيب ارقام قليله وهتزيد بالتدريج. . (ماعتقدش الافلام أو الاذاعات الاجنبيه هتفرق قوي لان ده امتحان وله طريقه محدده من الاخر زي الكتب بالضبط ده رايي الشخصي) 

2. Reading

ده له طريقه واضحه وهي حل الكتب Cambridge من 6-10. ابدا بقراءة الاسئله وعلم علي الكلمه اللي هتدور عليها في القطعه وهي اسم شخص او تاريخ او حدث او معلومه مهمه وبعدين الاسئله بتيجي غالبا بالترتيب فاول متلاقي اجابة سؤال حله تم انتقل للي بعده. متحاولش تفهم اوي واقرا بسرعه وخمن الكلمات اللي مش عارفها وحاول تخلص اول وتاني قطعه في اقل من 20 دقيقه لان التالته هي الاصعب 

اتدرب كتيير علي الطريقه دي لحد ما تجيب فوق ال 35 من 40 برضه وكل واحد ومستواه وقبل كل شئ توفيق ربنا لان ساعات بتبقي القطع صعبه جدا فعلا

علي فكرة انا خلصت في 54 دقيقه في المره الاخيرة وجبت 9

3. Speaking

محتاج ثقه بالنفس وتدريب وغالبا بييجي نفس المواضيع اللي في الكتب من 6-10 

الجزء الاول اسئله عامه عن نفسك بتتكرر اسمك-وظيفتك-ساكت فين وهوياتك

الجزء التاني موضوع تتكلم عنه دقيقتين بدون ما يقاطعك

الجزء التالت اسئله صعبه عن نفس الموضوع التاني 

4. Writing

وده العقده الصعبه عند كل الناس مبدئيا لو بتجيب مش معني انك بتجيب 6-6.5 يبقي المرة الجايه هتجيب ال 7 لو حسنت شويه ده الفخ اللي بيعملوه عشان ندخ الامتحان 100 مره

عشان تجيب 7 او اكتر لازم تعرف انت هتكتب كام جمله13-14 كلهم complex بترتيب معين وفيهم كلمات صعبه بدون تكرار

ازاي تعمل كده التدريب ثم التدريب ثم التدريب 

في كتاب حلو اسمه How to write at band 9 موجود على النت وومكن ابعته للي عايزه اطبعه واحفظه كويس 

ثانيا رايي لازم تاخد كورس مع حد كويس يصحح لك ويعلمك وللامانه اللي عمل معايا كده مدام سهير اللي في روكسي 

واقرا model answers كتيير عشان تتعلم جمل وكلمات صعبه وطريقة كتابتها

الكلام اللي فات كان للقطعه التانيه ودي الاهم

اما القطعه الاولي فهي عادة مكررة ولازم تعرف تكتب زى IELTS Simon فيها وده هايل

ان شاء الله هاحاول اعمل بوست تاني هاشرح فيه بالتفصيل ازي نكتب في كل من الموضوعين

من الاخر لازم تعرف هم عاوزين ايه وتعمله بالضبط

وقبل كل شئ ادعي ربنا كتييير يوفقك وركز جدا